---

Gabaygan Ina Cabdille Xasan wuxuu u titiryey ninkkii la odhan jiray Coffield oo
Soomaalidu u taqaan Koofil ahaana sarkaal Ingiriisa ooy Daraawiishtu ku dileen
dagaaladii Daraawiishta. Waxaa la yidhi markii Daraawiishtu dileen Koofil ayey
madaxa kasoo gooyeen oo keeneen xaruntii daraawiishta. Markaas ayuu
Sayidku gabaygan u tiriyey.

Wuxuu yidhi:

Adaa Koofilow jiitayaan, dunida joogayne
Adigaa jidkii lagugu wici jimicla'aaneede
Jahannama la geeyow haddaad aakhiro u jihato
Nimankii jannow kacay war bay jirin inshaalleye
Jameecooyinkii iyo haddaad, howhartii aragto
Sida Eebbahay kuu jirrabay mari jawaabteeda
Daraawiish jikaar nagama deyn tan iyo jeerkii dheh
Ingiriis jabyoo waxaa ku dhacay jac iyo baaruud dheh
Waxay noo janjuunteenba waa jibashadiinnii dheh
Jigta weerar bay goor barqaa nagu jiteeeyeen dheh
Anigana jikrey ila heleen shalay jihaadkii dheh
Jeeniga hortiisey rasaas, igaga joojeen dheh
Jiiraayadey ila dhaceen jilic afkoodii dheh
Siday kuugu jeexeen magliga jararacdii sheego
Billaawuhu siduu kuu jarjaray jiirarka u muuji
Nafjeclaysigii baan ku idhi jaallow iga daa dheh
Jaljalleecadii baa wadnaha jeeb ka soo ruqay dheh
Jeedaaladii baa indhuhu kor u jillaadmeen dheh
Jimic kagama helin tuugmadaan jiriyey ruuxii dheh
Markaan juuq idhaahdaba afkey iga jifeeyeen dheh
Dhaxaan jalaacaye dheg baan jalaq la ii siin dheh
Goortaan jarreerana gefoo nolol ka jaanqaaday
Sida janannadii hore tashigu igu jaguugnaa dheh
Taladii jinnigu ii hormaray jaasadeed helay dheh
Jiidaha xanuunka leh markii la igu jeeraarshey
Jibaadka iga soo baxay dadkii jiifka qaban waa dheh
Markay rubadddu jaw tidhi or bay iga ag jiibsheen dheh
Jidhkaygii bahal baa cunoo jiitay hilibkii dheh
Jurmidiyo baruurtii dhurwaa jugux ka siiyaa dheh
Jiljilladiyo seedaha tukay igaga jaadeen dheh
Haddaan lays jikaareyn tolkay laga jil roonaa dheh
Weligood waxaa lagu jaraa jilibdhig duullaan dheh
Daraawiishi waa jibindhow iyo jowga soo bixi dheh.