Qayb cusub oo loogu talo galay qaliinka adhiga laguna kordhinaayo warshada hilibka Burco oo ku taala bogcad 5km ka xigta dhinaca galbeedka magaalada burco ayaa maanta si rasmi ah furitaankeeda lagaga dhawaaqay xarunta warshadaas.
Qaybtan cusub ee lagu kordhinaayey warshadan hilibka oo ka kooban kawaan balaadhan oo lagu gawracayo xoolaha ay qalayso warshadu iyo diyaarinta qaliinka gacanta waxaa loogu talo galay sidii loo sahli lahaa wax soo saarka warshada ama loo waafajin lahaa hanaanka dhaqanka ee qaliinka, isla markaana waxaa furitaankeeda ka qayb galay maamulka shirkada, ganacsato iyo xubno ka mid dadka saamilayda warshada.
Faahfaahinta sheekada
Maareeyaha warshada hilibka Burco Dr. Axmed Caydiid Maxamed oo isagu xadhiga ka jaray qaybtan cusub ee lagu kordhinayo warshada ayaa waxa uu sheegay in ay warshada oo afkaartii lagu aasaasay ay salka ku haysay in wax laga badalo ganacsigii hore ee xoolaha gaar ahaana habkii dhoofinta oo la doorbiday in xoolaha lagu qalo wadanka gudihiisa si loogala hadho waxyaabo badan oo laga faa’iidaysto, sida hilibka beerka, haraga, kalyaha, hilibka cunaha, maskaxda, mindhicirada Iwm. Kuwaasi oo fursado kale loo isticmaalo.
Maareeyuhu waxa kale oo uu intaasi ku ladhay in qaybtan cusub ee lagu kordhiyey warshada oo ay ku baxday lacag dhan $400, 000 afar boqol oo kun oo Dollar ay ugu talo galeen in lagu yareeyo culayskii qaybta Automatiga ee qaliinka si gacanta loogaga shaqeeyo gawraca xoolaha iyo qaliinka fududba.
Maareeyahani waxa kale oo warkiisa ku sheegay in warshadani ay wiigii sedex jeer u dirto shirkadaha Dubai iyo shaariqa 5100 neef oo adhi ah iyada oo saacadii kawaanadeeda lagu qalayo 300 oo neef isla markaana wiigkasta sedex jeer ay dabada wax u dirto, maareeyuhu isaga oo ka hadlaya ahmiyada kawaanadan cusub waxa uu yidhi shaqaalaha aannu adeegsanaa waxay u badnaayeen muwaadiniin waxaanay xirfadoodu u badnayd qaliinka gacanta sidaas awgeed waxaannu go’aansanay si aannu u sahalo shaqadooda ama qaar cusubi shaqo u helaan in aannu habkan u badalo, iyada oo shaqaalaha hadda warshada ka shaqeeyaa ay gaadhayaan 100 qof.
Warshadan hilibka oo ah warshadii ugu horaysay ee laga hir galiyo magaalada Burco waxaa la aasaasay 2000 waxaanay si rasmi u hawlgashay November 2004 taasi oo ay maalgelinteeda iska kaashadeen ganacsato ka mid qurnbajooga Somaliland kuwa gudaha iyo maalgeliyeyaal ajaanib ah waxaanay hada dibada u dirtaa hilibka qaydhin ee adhiga
Weedha Ganacsatada
C/raxmaan Ibraahim Yaasiin oo ah madaxa iibka xoolaha ee wershada ayaa isaguna wax uu cadeeyey inay wershadu bishii December 05 ay debeda u dhoofisay 21000 neef oo adhi ah kuwaasi oo ay saylada ka saareen hilibkii adhiga ee wadamada Australia iyo India islamarkaana ay qayb mihiim ah ka qaateen dhaqdhaqaaqa saylada xoolaha ee wadanka gudihiisa iyada oo maalintii sayladaha gobolada awdal Hargeysa iyo Burco laga faasaxo 3000 neef oo adhi ah oo midkiiba uu warshada ku joogo 14 ilaa 20 Dollar iyada oo sidaas si leegna ay khasnada dawlada ku soo xereeyaan cashuur culus.
Sarkaalkani waxa kale oo uu intaasi ku daray in qaybtan cusub ee qaliinka ee warshada lagu kordhiyey ay u sahli doonto shaqaalaha in ay wax badan soo saaraan,
iyadoo cadadkii u danbeeyey ee ay warshadu debeda u dirta 12631 Kg oo hilib ah “sayladaha xoolaha laga iibsado waxaannu ka noqonay dad lagu kalsoon yahay” ayuu yidhi
Gunaanadka
Dhinaca kalena waa markii u horaysay ee ay warshada hilibka Burco ku dhawaaqday in ay guulo ka gaadhay tartanka sayladaha debeda iyada oo qabadaha ugu waawayn ee haystay ay ka mid ahaayeen suuqgaynta hilibka.

Gudoomiyaha Gobolka Togdheer Oo Ku Dhawaaqay Oo Soo Saaray Qaylo Dhaan Abaareed